ردیف ص ۔۔۔۔۔۔۔۔۔دیوان ِمنصور آفاق

ردیف ص

دیوان ِمنصور آفاق

mansoor afaq poetry

غزل

فردوس سے آگے ہے وہ سرچشمہ ء مخصوص
جاتا ہے مدنیہ سے بس اک رستہ ء مخصوص

اپنی تو رسائی نہیں اس بامِ فلک تک
معلوم کیا جائے کوئی بندہ ء مخصوص

اے شہرِ گداگر ترے والی کیلئے کیا
بنوانا ضروری ہے کوئی کاسہ ء مخصوص

انکارِ مسلسل کی فصیلیں ہیں جہاں پر
تسخیر کروں گا میں وہی رشتہ ء مخصوص

اک نرم سے ریشے کی کسی نس کے نگر میں
بس دیکھتا پھرتا ہوں ترا چہرہ ء مخصوص

کہتے ہیں کہ آسیب وہاں رہنے لگے ہیں
ہوتا تھا کسی گھر میں مرا کمرہ ء مخصوص

سنتے ہیں نکلتا ہے فقط دل کی گلی سے
منزل پہ پہنچ جاتا ہے جو جادہ ء مخصوص

لوگوں سے ابوزر کے روابط ہیں خطرناک
صحرا میں لگایا گیا پھر خیمہ ء مخصوص

ہنستے ہوئے پانی میں نیا زہر ملا کر
بھیجا ہے کسی دوست نے مشکیزہ ء مخصوص

آواز مجھے دیتا ہے گرداب کے جیسا
منصور سمندر میں کوئی دیدہ ء مخصوص



دیوان منصور آفاق